Teneualiztli
1.Tlaltotoniliztli, tletlaliliztli, tlaluaquiliztli, tlazolehecameh, yolcameh uan cuautlan inmictiliz, ocachi atolinilizcauitl nochi centlalpan, totlaltzin ixpoliuiliz, ocachi mayanaliztli: nin panotica ipal totlalnantzin ouicayonemitica, tepolocan cahuitl tinemiticateh.
2. Totlalnantzin ouicayotl noihqui ca totlacamecayo inouicayo, mah titetzicoah uan ximocualnemilican tlen titlachiuaticateh tlalicpac, mah tihiyotemican uan ximonehnemican yecohtli tla tinemiznequih totlalicpac zatepan. Xiontlamican totlalpolouiliztli.
3.Yopanoqueh cempoual uan mahtlactli xiuimeh, ica nin cauitl ocachi otiquixtiliqueh totlalnan iaxcauan. Mexico panotica ocachi ouicayotl, quipia ueyi cuautlalpan auh noihqui momoztla ocachi motlalpoloua.
4. Nochi totlalpan, Mexico ce ouican tla titzahtzih ipal totlalnan intlanauatiliz, tla tipaleuiznequih totlalnan, tla titlalpixqueh, tla titemanahuianqueh. Zan achi nauatiltin paleuiticateh totlalnan.Ticpiah miec ichtequiqueh tecpanihtic. Zan quinequih tomin. Ahmo cualli teyacanqueh techteyacanticateh. Ahmo quimatih tlen melauac monequi totlalnantzin, ahmo quimatih tlen melauac monequi totlacamecayo.
5. Totlalnantzin tolinizcayotl noihqui totepahtiliz uan nochi anauac ouicayotl. Quihtoa ‘Instituto Nacional de la Salud’: cehcen xiuimeh miquiticateh chicoacexiquipilli mexico tlacameh tlazolehecameh ipanpa.
6. Ye oquilui ‘Organización Mundial de la Salúd’: COVID-19 ueyi cocoliztli omotlacati ipanpa tlen totlacamecayomeh tlachiuaticateh tlalicpac.
7.Ica totlalnan itoliniliz, nochi tlamantin yolcameh, xiuimeh, cuautlalpan, ouicanticateh noihqui. Queman 2019 xiuitl, ‘Senado de la República’ oquinotzaya ‘Ejecutivo Federal’: ”Ximotenehua, ximocuiloua ce nauatilli canin tiquixmati totlalnan ouicayotl, uan xichiua nauatiltin tlen mocaualtia tlazolehecameh, ximocentoca ‘Ley General de Cambio Climático, el acuerdo de París uan Ley de Transición Energética’.
8. Miec Cetiliztin, tlamatqueh, temachtiqueh, tlalpixqueh uan maceualtin ye noihqui omoteneuacan totlanotzaliz. Queman titeneuah totlalnantzin itoliniliz, noihqui melauac tiquixtlauizqueh tonauatiltin, inin toyecnemilizuan nauatiltin, ueliz tiouicanquixtiqueh nochi tlacameh tlalicpac, tinemizqueh chipauac tlalpan, cenpaqui tlalli, inin oquihto ‘Consejo de Derechos Humanos de la ONU’ ye ce xiuitl.
9. Tla ahmo ticpiah nin yecnauatilli, ahmo ueliz ticpiazqueh occe yectlamantin, ahmo ticpiazqueh totepactiliz, tonemiliz. Queman titenehua totlanotzaliz, noihqui tipaleuizqueh tlen monemilia ica totlalnan itoliniliz.
10. Tiyecyacanaz tocniuhyo itlachiualiz tlalicpac, titlacuiloceh ocachi cualli nahuatiltin, ticualxexelozqueh totomincayo, toaxcahuan, noihqui tipaleuizqueh ahquin techmanahuia, tiquizcaltizqueh totlalnan.
11.Yoahico tonaltin tiyaochiuazqueh ipal totlalnan, ximoyecchiuacan toohuan tlalicpac. Ximoteneuacan totlaltoliniliz tlanotzaliz, ica nin nauatilli ueliz tipaleuizqueh nochi totlaltzin, ueyi altepemeh Mexico ihtic, Latinoamerica uan nochi tocentlalpan.
12. Ximocaquican tocoluan, toilamauan, tocniuan, toconeuan, ahmo xioncaqui ayecyo teyacanqueh tecpanihtic, ximocentilican nochi totozquiuan uan xitechpaleuitiuh totlazohtlalnantzin, toueuetlamantin uan inaltepeuan: zatepan tinemizqueh ica ce ocachi cualli ohtli, ce ocachi cualli nemiliztli, ica toyolpaquiliz.
13. Ica inin tlanotzaliz tiquihtoah: ‘xitechcaqui Gobierno de México, xitechcaqui nochi altepemeh tlen Mexico ihtic, ximoteneuacan totlalnantzin inouicayotl, ximochicauatia totlalpaleuiliztli, ximopaleuican ahquin temanaui totlalnan, tocuentlayotl.
14. Ye tiahcicamatih, ticentilizqueh nochi tlacameh uan ciuameh, cecan titeneuazqueh totlalnantzin itoliniliz, ueliz toteyacanqueh ica ‘gobierno’ techcaquizqueh uan yecchiuah inin ohtli.
15. Queman titlalia momachio tlanotzalizpan, ticentilizqueh toyaochiualiz, tiyecchiuaz tlen monemilia ica tonan itoliliniz, tixeliuizqueh tlen titlalquixtica, tipaleuizqueh totlalnan uan nochi toaltepemeh.
16. Ahmo xiquilcahuacan, icnotlacameh ocachi toliniticah ica totlalnan iouicayo. Queman ahmo mopia tomin, ocachi motolinia. Icnopiltin, icnociuameh, icnoilamatin, toachtoaltepemeh noihqui tolinia.
17.Ipanpa, queman totlalnantzin nemi ouican, noihqui teuantin tinemizqueh ouican. ¡Ximopalehuican!¡Ximotenehuacan totlanotzaliz!
Ximonemiliah totloctzinco: totlalnantzin iyecnemiliz. Hueliz tipatlazqueh tlen tichiuah tlalicpac, tipaleuizqueh topilhuan, toconehuan.
Timonequih momahcuepaz toyuhcayo, ce pahpactoc yuhcayotl, chicauactoc iuan nochipa moyancuitia.
Tiyecchihuazqueh tlen tichiuaticateh tlalicpac, titlamiznequi tlazoltlalpan, ahmo cuitlapan axixpan tinemiznequih. Tiohuicanquixtiliznequih totlalnantzin.
Ca cenca ipatiuh tlen tinemiliah, tlen timomatih: tla tipehua toyecchihualiz, ocachi timatizqueh, ocachi tiyecchihuazqueh totequiti, titzalozqueh occe tlamatiliztli, occe tlamantli, occequin tozcameh ticaquizqueh, iuan noihqui ica tlen ye ticmati tipatlazqueh tlen panotica ica totlalnantzin.
Tipoztequiznequih axcahuaqueh ihuelitiuh, tichiuaznequih yancuic matlameh namohuian.
Mah cualli ximoaxiltican nocnihuan tlen tequitiznequih ica toyeyantin ipatlaliztli.
Nochi tlen tichiuazqueh, tichiuazqueh ica tlacaxoxouhcayotl, ahmo ticualaniz, ahmo timotlaz, ahmo titlaueliz, zan paquiliztli tipatlazqueh totlalnantzin ohuican.